Health and beauty

Nikten puan silh dan

Thang No

HIV Natna Dam theita??

Naupang 1 leh ulian 14 HIV natna pan
damna ngah kik : http://huff.to/YyRtmz

Neek leh Dawn

Written by Pau Tun Thang on 05 May 2012. Posted in Health

Share ~ Na hawmsawn ve

Zing leh nitak simin mihing ten ann neek kuul hi.Sum bei kuul a, hun bei kuul in ann huan leh kuang sil kuul lai lai hi.Tua manin nupi pawlkhatin, “ Zing sim nitak sima ann huan det mah mah” ci in cimtak thei uh hi.Hih i leitung pumpi neek leh dawn tawh vaak det a kul man in mikim ki buai hi.Khat vei vei bang hanga Pasian in ann khat vein eek sawt vei pi ki mang ding in hong bawllo ahi tam? cih ngaihsutna om thei hi.Ahizongin Pasian in a deihna khat om hi ding hi.Neek leh dawn ki tangsam lo hi leh Evi in zong Eden huanah theigah ne lo dinga mihingte mawhna ah ki lut lo ding hi.Neek leh dawn a ki tangsap mani leitungah hinna neite Direct leh Indirect in kine hi hang.Tua in ki thahna piangsak ahihmani galmuang lo tuam hi.Bang hangin Bawngte Humpineelkai maiah galmuang takin gamta ngam ding?Khat a gilvah theih nangin khat a sih kuul se mawk hi.Humpi in Bawng na ne leh tua pen mawhna i ci thei tam?

Hih dan a khat leh khat kineekna lei tungah lemna leh munana bukim a om tak tak thei diam maw? Neek leh dawn kitangsapna in gitlohna piangsak hi mai lo amaw?Leitunga nuntakna nei lim lim nisimin neek leh dawn ding ngaihsun in buai zel hi hang.Neek leh dawn ding ngaihsut manin nisim guahzu nisa nuaiah na kisem hi.Nasep cih ciang sumzawng cihna zong hi thei hi.Sum zon hang pen a tuam tuam om thei hi.Ahizongin tuate’ laka akitangsam masa pen neek leh dawn mah hi.Neek leh dawn kitangsapna om lo hi leh tuzahin sum ki zong sam lo ding hi.Hih zaha kitangsap lai tak nangawnin hoih sep nuam lo lai hi hang.

Ganhingte zong ngaihsun leeng neek leh taak zong in buai mah mah sam ve uh e.Ganhing te kumpi a kici liang Humpineelkai ten zong neek ding a zon veve uh kuul hi.Tua ahih manin nisim in neek ding gamsa dang zong kawi kawi hi.Vasate zong neek ding zongin zingsang sim leengkhia uh hi.Miksi te deuh deuh bang thanuam uh a tawlnga- a, a om hithiat lai uh muhding haksa mah mah hi.Neek ding nawn cih takin nawn in khawlkhawm deep uh hi.Inn a i gan vulh ten zong ann hong pia meng meng un a ci mah bangin ham ham uh hi.Pawlkhat bangin i piak zong ngak zo lo in na nesim thei lai uh hi.Thosi bangin i neihsa te bek tham lo in ei nangawn hong ne ta zen uh hi.Huat huai mah mah uh hi.Ahizongin hih khempeuh te kitangsapna a om mana a piang ahi hi.Neek leh dawn ki tangsapna in leitunga teengte hong buaisak mah mah hi.Mihingte bang i taksa bek tham lo in i kha nangawn hong buaisakzo hi.Kawl ten , “ Gilvah lo a Pasian biak haksa hi” ci uh hi.I gilpi neek leh dawn a lim thei thei tawh i vaak nopna in a hoihlo na tuam tuam hong tun thei hi.Huai hamna, guktakna leh khialna a tuam tuam te om thei hi.

A leh lam pan i ngaihsut ciang bel ne thei dawn thei a i om pen Pasian’ thupha khat hi.Neek leh dawn kuul lo hi mawk leh neek theih tuam tuam te’ limzia(thuk,khum,al, kha, mak, thak etc.) thei lo ding hi hang.”Thei lo” cih kam mal sangin “thei” cih kammal pen na khempeuhah hoih zaw hi.Neek leh dawn in mihingte hong kipumkhat sak hi.Kipawlna a tuam tuam te bangah annkuang umkhawmna tam leh kipumkhatna om zaw hi.Biak Inn a kikhawm nuam lo te nangawn lungdambawl ann neekkhawmna ah pai nuam uh hi.Lawm leh gual te ann neekpih leh niangtui dawn pih zel khawng hoih hi.

Neek leh dawn pen khat leh khat iki deihsakna kilatsakna zong ahi hi.It leh ngaihte tawh neek khawp dawnkhawp pen manpha mah mah hi.A lim te nangawn ei guaka neek pen nuam khin tuan lo hi.Neek khawm leu leu pen a lim khawllo nangawn a lim bangin ki ne thei hi.Mihingte nuntakna leh neek leh dawn pen kizawm ngiat hi.Tua manin nekhawm dawn khawm ding hi hang.I neek khawp i dawn khawp theih lai teng ki lemlai cihna ahi hi.Neekkhawmna in hehna nangawn damask thei hi.Tuadan ahih manin Pasian in ne thei dawn thei a hong koih pen lungdam huai mah mah kik hi.Vangamah bel gilkial dangtak om nawn lo ding a nuam mah mah ding hi.

Thukhupna:

Mihingte Satanin neek leh dawn zangin hong khem hi.Tua khemna do zo loin mawhna nei ki suak hi.Tua mawhna pan in Jesu in ama taksa leh sisan tawh hong honkhia kik hi.(Gen.3:1, Mt.26:28).Neek leh dawn hangin mi mawh ihi a, neek leh dawn hang mahin siam i tangkik hi.Jesu taksa leh sisan ne a dawn ten mawhna khialhna pan hot khiatna ngah uh hi.Tua bang mi ten midangte’ neek ding laksak loin midangte neek ding pia zaw uh hi.Khristian te midangte nuntakna a susia hi lo in amau’ nuntakna midangte adinga pia khia ngam hi zaw ding hi.Tua ahihmanin eima’ gilpi bek ngaihsun nawn lo in neek leh dawn pen kipum khatna dingin zangsiam zaw ta ni.

N.Pau Tun Thang

Khedap bulhlo in lampai hoih

Written by ZomiDaily on 21 November 2011. Posted in Health

Tweet

ZomiDaily :: Khedap bulhlo in lampaina hangin lungkham sinkhamna (Stress) kiamsak cihi. Hihpen "Germany’s Federal Institute for Posture and Mobilisation Support" pan amakai pipa ahi Dieter Breithecker in agenkhiat hi a, ih khetul leh khepek tawh leilak aki sukkhakna hangin lunggimna leh lungsim zawngkhalna te damsaktuam aci ahihi. Ih Zogam khuaneu khuata te ah khedap bulhzolo ki tamlai mahmah a, khedap bulhloh ahoihna om ahihleh lungdamhuai cihding ahihi.

Khedap bulhloh hoih cihsam hangin ninbu lomlak, thawlkitam leh linglak cihte lakah khedap bulhlo in paipahding hilo hi. Tuabang lauhuaina tepan kidaltheih nadingmah in khedap akibawl masa hizaw hi. Ahi zongin tuhunciang adiakdiak numei te bulhding in khedap tawsang atuamtuam kibawl in kibulh a, khedap tawsanglua bulhzong hoihtuak hetlo hi.

Khedap bulhlo in paileng ahoihna munpen sehnellak leh suanghumnel lak cihkhawng hiphadiak a, tua munte ah khedap bulhlo in paileng phattuamna tampi ongpiathei nahi gige hi. Tua ahih manin sumnei mihau te tuipigei Beach khawngah tawlnga dingin zintheizel uh a, tuipinawl sehnel lakah khedaplo tawh pai hiathiat thei uhhi.

A khangto gamte ah tuhun ciangin tuipigei pai akul tektek nawnloding in Apartment leh Condominium khawngah sehnel leh suanghum tawh lampai nading atuam in kibawlta hi.

Phalbi zingsangtung lopa leh kiaktung ah daitui akawt nilhnelh laitak khedap lotawh atungah paileng hoihphadiak ci'n Dieter Breithecker in genthuah hi. Khedap bulhlo in lampai hoih ahih mawkleh sumbei dinglah hisamlo ahihciang eizong khedap bulhlo in paimawkleng hoihlodia? ZomiDaily

HIV kilawh theih natna akhingdai sak Truvada kici Damtheih na Zaa

Written by Hau Thang on 18 July 2012. Posted in Health

Share ~ Na hawmsawn ve

ZomiDaily :: HIV kilawh theihnatna akiamtuam sak' akhingdai sak thei zaa kibawl ta in USA pan in hawm khiat dingphalna kipia hi cih BBC kawltong thuphuan pan tangko khia ta hi. Tua damdawi na Zaa in Truvada cih min kivawh a, kilawh theihding muanmawhna aom ciang in zatding ahihi cihi.

Tua HIV damdawi zaa nazatbanah Paandel (Condom) zat beh na in natnalungno hem khia beh tuammahmah ahihi cihi. Hih HIV damdawi Zaa in 75% natna kilawh nading pan liahdal zo ahihi cih USA damdawi za lam pilciimsiam tungnung mite genson sawibeh sawn ahihi. ZomiDaily/HauThang

A lauhuai FOP Natna lamdang (Suangtum natna)

Written by Artist Kham Khan Suan on 10 December 2012. Posted in Health

Share ~ Na hawmsawn ve

Stone Man Syndrome cih a,mitampi te i theih Fibrodysplasia Ossificans Progressiva(FOP)in ahi takpi a suangtumpi asuaksak natna lamdang khat ahi hi.Suangtum takpi ahilo tei hang in,pumpi khat tung a asatak,muscle,tissues teng khempeuh guh le taang in akikhelsak natna khat zong ahi hi.leitung ah alauhuai khe mahmah natna te sung ah zong kihel in mi million2 sung ah mikhat aom thei natna namkhat ahih ban thamlo,tuni hun ciangciang akikan napan FOP natna angah leitung ah mi2500val pha khin ta cih thu le,tua natna pen Cancer natna te sung a khat in zong kiciamteh ahi a,ahaksa le akhel mahmah natna khat hi citciat ahih man lamdang in minthang kawm zong ahi hi.

Hih natna tawh leitung a thang mitampi ten athei khat ahi America gam Philadelphia khuapi pan a Harry Raymond East Lack,Jr.(1933-1973)in kum10 aphak hun in akimawl napan akheguh tawm liamsuah kha ahih manin,tua aliamma pan kipan guh apiangsak (Fibro tissues)te hong kibelap to semsem in,apumpi mun khempeuh ah aguh bekbek khawl hun omlo in hong khang toto le hong kimatcip in acipum pi phial aguh hongsuak ahih manin,kum40 acin nading tawm akisap hun in hong si ahi hi.A sih kuan in amuh/akam simlo acipum taang khia zo nawnlo zong ci uh hi.Harry nuntakna tung pan Tell-Tale akici Movie khat 2009kum in kizaih a kineih siam khat ahi Actor Josh Lucas tawh kizaih ahih nathu zong kiza ahi hi.

FOP natna lungno ading tuhun ciang dong zatui kimuzo nailo ahi hi.Harry in bel aluang hawm pen Philadelphia Theatre ah asih main apumpi piakhia kholh ahih man,tua mun san ah tu in zong kikoih in kien thei zong ci hi.Zatui lam a Mipil te'n tua natna lungno thak theizo nading zatui kan den lai uh zong ci hi.1999 kum in misane ngasa(Shark)i pumpi sung pan a kila vante tawh natna dam nading zatui abawl uh hang bangmah kilam dan namel om tuanlo zong ci uh hi.

FOP in pianpih natna hizaw pian ahih na'le kum10 nuai apha mite tung ah zong piang zawdeuh phadiak ahih nate nat na akipatna pan ih pumpi bup khat guh bek asuah nading in,gawl pan kipan liangko,tua pan ih ban,gil,tuapan khe lang nih cih dan in atung pan anuai lam ah,kikhin suk in,tua pan lutang aban ah ih kam/muh te taang theilo a aop hun ciang poimawh mahmah ta in,ih sih nading anai ban ah,mikhat i pumpi khempeuh guh bekbek in kikhelsak FOP(Suangtum natna)in lamdang sak ahuai le alau huai penpen natna khat ahih nathu kiza ahi hi. Source: Crazybag Online Family

Kham Khan Suan (Artist Kyaw Kyaw Oo